Lajmet

Me kërkesën e Auditorit të Përgjithshëm, z. Besnik Osmani sot në ambientet e Qeverisë është realizuar takimi me Kryeministrin e Republikës së Kosovës z. Ramush Haradinaj. Në këtë takim, z. Osmani ka informuar Kryeministrin Haradinaj për punën e Auditorit të Përgjithshëm, si institucion suprem i kontrollit ekonomik dhe financiar në Republikën e Kosovës. Auditori i Përgjithshëm ka theksuar përkushtimin e tij dhe të auditorëve të Zyrës Kombëtare të Auditimit për të përmbushur mandatin kushtetues e ligjor, në funksion të përmirësimit të vazhdueshëm të qeverisjes e të llogaridhënies në institucionet publike të Kosovës në menaxhimin e fondeve publike si dhe të përmirësimit të shërbimit ndaj qytetarëve. Auditori i Përgjithshëm ka prezantuar çështjet kryesore lidhur me pasqyrat vjetore financiare dhe dobësitë e evidentuara në lidhje me pajtushmërinë e vendimeve dhe veprimeve të zyrtarëve publik në raport me legjislacionin përkatës. Rekomandimet e dala nga raportet e auditimit të Zyrës Kombëtare të Auditimit vënë  theksin në çështje të rëndësishme që kanë të bëjmë me menaxhimin e pasurisë jofinanciare, menaxhimin e prokurimit publik, menaxhimin e llogarive të arkëtushme dhe të obligimeve, theksoi Auditori i Përgjithshëm. Z. Osmani e ka njoftuar Kryeministrin edhe me auditimet e performancës si vlerësim i arritjes së vlerës për para nga përdorimi i fondeve publike dhe theksoi rëndësinë që të përmirësohet edhe më tej efikasiteti dhe efektiviteti në shpenzimin e parasë publike. Gjatë bashkëbisedimit, vëmendje e veçantë i është kushtuar nivelit të ulët të zbatimit të rekomandimeve dhe mungesës së një plani sistematik për adresimin e tyre, nga ana e organizatave buxhetore. Auditori i Përgjithshëm, i ka rekomanduar Kryeministrit Haradinaj që Qeveria të aplikoj një proces sistematik të monitorimit të zbatimit të rekomandimeve të dhëna në raportet e auditimit dhe të kërkojë nga organet e Qeverisë që të zbatojnë dhe raportojnë mbi progresin e arritur. Kryeministri Haradinaj ka vlerësuar punën e Auditorit të Përgjithshëm dhe të Zyrës Kombëtare të Auditimit dhe ka shprehur interesimin e tij për një komunikim më proaktiv ndërinstitucional për të reaguar në kohën e duhur për mbarëvajtjen e proceseve dhe përmirësimin e qeverisjes. Ai ka shprehur gatishmërinë dhe përkushtimin e Qeverisë për të ruajtur pavarësinë institucionale të Zyres Kombëtare të Auditimit dhe ka theksuar zotimin e tij për zbatimin e rekomandimeve të Auditorit në mënyrë që të forcohet kontrolli i brendshëm dhe të përmirësohet qeverisja në institucionet publike.  

Me ftesë të homologut të tij, Auditorit të Përgjithshëm të Uellsit, Auditori i Përgjithshëm i Republikës së Kosovës z.Besnik Osmani, ka qëndruar për një vizitë zyrtare në Zyrën e Auditimit të Uellsit të Mbretërisë së Bashkuar. Kjo vizitë u zhvillua në kuadër të bashkëpunimit bilateral që Zyra Kombëtare e Auditimit të Kosovës ka me Zyrën e Auditimit të Uellsit të Mbretërisë së Bashkuar. Gjatë qëndrimit në Uells, më 7 e 8 nëntor 2017, z. Osmani ka takuar Auditorin e Përgjithshëm të Uellsit, z. Huw Vaughan Thomas dhe zyrtarë të tjerë dhe auditorë të Zyrës së Auditimit të Uellsit me të cilët ka biseduar për aktivitetet konkrete në kuadër të realizimit të marrëveshjes së bashkëpunimit që ishte nënshkruar në mes të dyja institucioneve supreme të auditimit, në maj të këtij viti në Prishtinë. Bashkëbiseduesit u pajtuan që bashkëpunimi në fusha të ndryshme të auditimit të vazhdoj me qëllim të shkëmbimit të informatave, përvojave dhe praktikave të mira në interes të ngritjes së nivelit të cilësisë së auditimit të jashtëm në të dyja vendet. Gjatë vizitës së tij në Uells, Auditori i Përgjithshëm u takua edhe me zyrtarë të lartë të Qeverisë së Uellsit dhe të qytetit të Kardifit, z.David Richards, drejtor për qeverisje si dhe z.Paul Orders, shef ekzekutiv i Këshillit të qytetit të Kardifit, me të cilët bisedoi për marrëdhëniet ndërinstitucionale me Zyren e Auditimit të Uellsit si dhe zbatimin e rekomandimeve të auditimit. Në kuadër të kësaj vizite, z. Osmani ka zhvilluar takime pune edhe me drejtuesit e Zyres Kombëtare të Auditimit të Mbretërisë së Bashkuar, në Londër, si dhe ka takuar deputeten e Parlamentit Britanez, znj. Rt Hon Margaret Hodge dhe përfaqësues të Universitetit të Kembrixhit.

Auditori i Përgjithshëm i Republikës së Kosovës z. Besnik Osmani dhe Rektori i Universitetit të Prishtinës z. Marjan Dema janë takuar sot dhe kanë biseduar lidhur me aktivitetet konkrete të bashkëpunimit. Me këtë rast, është nënshkruar Marrëveshja e Bashkëpunimit në mes të dy institucioneve përmes së cilës janë përcaktuar fushat konkrete që kanë të bëjnë me shkëmbimet e ndihmës profesionale dhe akademike si dhe të angazhimit në punë praktike të studentëve të nivelit master të Universitetit të Prishtinës në Zyrën Kombëtare të Auditimit. Auditori i Përgjithshëm, Besnik Osmani tha se e vlerëson lartë bashkëpunimin me Universitetin e Prishtinës dhe se ky bashkëpunim profesional është shumë i rëndësishëm për faktin që na mundësohet të praktikojmë edukimin e vazhdueshëm për personelin tonë përmes aktiviteteve arsimore, programeve të trajnimit dhe shkëmbimit të njohurive, në disa fusha që kanë të bëjnë me politikat publike, administratën publike e veçmas në fushën e kontabilitetit dhe auditimit. Nga ana e tij, rektori Dema tha se nënshkrimi i kësaj marrëveshje të bashkëpunimit me Zyrën Kombëtare të Auditimit është një akt shumë i rëndësishëm për UP-në, meqë me këtë do përfitojnë më së shumti studentët tanë. Dema në këtë takim foli edhe për punën që ky menaxhment është duke bërë duke krijuar standarde transparente në UP, në mënyrë që të krijohet një ambient edhe më cilësor për studim. Marrëveshja e nënshkruar sot, parasheh që të dy institucionet t’i ofrojnë ndihmë reciproke profesionale njëra-tjetrës për realizimin e konferencave, seminareve sidomos në fushën e auditimeve të përformancës dhe synon animimin e opinionit publik lidhur me rëndësinë e auditimeve dhe përfitimet e institucioneve dhe publikut nga raportet e Zyrës Kombëtare të Auditimit. Për zbatimin e kësaj Marrëveshjeje, ditët një vijim do të hartohet plani i veprimit dhe do të filloj zbatimi praktik i Marrëveshjes.  

Auditor i Përgjithshëm i Kosovës, z. Besnik Osmani, sot ka paraqitur para Kuvendit të Republikës së Kosovës, Raportin Vjetor të Auditimit për vitin fiskal 2016. Raporti Vjetor i Auditimit për vitin fiskal 2016, përmban gjetjet dhe rekomandimet kryesore për buxhetin e shtetit për këtë vit. Të dhënat e prezantuara në raport janë të bazuara në raportet e auditimit për 92 organizata buxhetore, 4 ndërmarrje publike, 2 projekte të donatorëve dhe 7 auditime të performancës. Opinioni i auditimit për Raportin Financiar Vjetor të Buxhetit të Republikës së Kosovës (RFV/BRK) është “Opinion i pamodifikuar me theksim të çështjes”, dhe paraqet një pamje të drejtë dhe të vërtetë në të gjitha aspektet materiale për vitin e përfunduar me 31 dhjetor 2016, në përputhje me SNKSP dhe Ligjin për Menaxhimin e Financave Publike dhe Përgjegjësitë. Theksim i çështjes vije për faktin se nuk është bërë shpalosje adekuate e informatave sa i përket shënimeve shpjeguese. Auditori i Përgjithshëm i Kosovës, z Besnik Osmani, në fjalën e tij para deputetëve ka theksuar se shkalla e zbatimit të rekomandimeve të dhëna në raportin e auditimit të vitit paraprak, nuk është e kënaqshme. “Në raportet individuale të auditimit kemi dhënë mbi 1,300 rekomandime nga të cilat mbi 900 me prioritet të lartë dhe 400 me prioritet të mesëm. Krahasuar me vitin 2015, në vitin 2016 numri i rekomandimeve të dhëna është rritur për 13%. Në vitin 2015 janë zbatuar më pak rekomandime se sa në vitin paraprak. Vetëm ¼ apo rreth 26% janë zbatuar plotësisht, 36% pjesërisht dhe 38% nuk janë zbatuar fare.” – tha ai. Gjithashtu ka vënë në pah disa nga gjetjet kryesore të fushave me rëndësi të shpalosura në raport si: menaxhimi i prokurimit publik, menaxhimi i pasurive publike, obligimet e papaguara, llogaritë e arkëtueshme, ekzekutimi i detyrueshëm i pagesave, Ndërmarrjet Publike, si dhe fushat me rëndësi të veçantë nga auditimet e performancës. Auditori i Përgjithshëm, ka kërkuar nga Qeveria, që të aprovojë dhe zbatojë planin e veprimit për adresim të rekomandimeve të dhëna në raport. Në fund të fjalës së tij, z. Osmani, ka ftuar Kuvendin dhe Qeverinë që të përmbushin rolin e tyre në rritjen e llogaridhënies nga organizatat buxhetore dhe përmirësimin e gjendjes në zbatimin e rekomandimeve të auditimit.  

Presidenti i Republikës së Kosovës, Hashim Thaçi ka pritur sot Auditorin e Përgjithshëm të Kosovës, z. Besnik Osmani, të cilit i ka dhënë mbështetje për punën dhe aktivitetet e Auditorit të Përgjithshëm. Presidenti Thaçi ka thënë se Auditori i Përgjithshëm me punën e tij është duke forcuar llogaridhënien duke rritur besimin në institucionet publike. “Ju përgëzoj për përkushtimin, profesionalizimin dhe pavarësinë e institucionit tuaj”, ka theksuar Presidenti. Nga ana tjetër, Besnik Osmani ka thënë se Zyra Kombëtare e Auditimit do të vazhdojë të bëjë auditimin e detyrueshëm të rregullsisë për Buxhetin e Qeverisë së Kosovës si dhe auditime tjera. Presidenti ka thënë se Kosova duhet të vazhdojë përpjekjet maksimale për transparencë Lajmi është marrë nga uebfaqja e Zyrës së Presidentit : http://bit.ly/2yECPE9  

Me datë 18 tetor 2017, në Tiranë, Auditori i Përgjithshëm i Kosovës, Besnik Osmani i shoqëruar nga Ndihmës Auditorja e Përgjithshme, Vlora Spanca, morën pjesë në takimin e 15^-të  të grupit punues të EUROSAI-t për Auditimet e Mjedisit (WGEA), organizuar nga Kontrolli Lartë i Shtetit të Shqipërisë. Temat kryesore të aktivitetit ishin “Auditimi i përdorimit të tokës dhe zhvillimi” dhe “Si mund të përdoren të dhënat në auditimet e mjedisit?”. Në këtë takim morën pjesë rreth 75 përfaqësues nga 26 Institucione Supreme të Auditimit. Ky grup pune ka në përbërjen e tij 42 anëtare dhe është krijuar ne vitin 1999 në Kongresin e IV-t të EUROSAI-t. Qëllimi i këtij grupi është promovimi i frymës së bashkëpunimit bazuar në integritet, komunikim të hapur dhe përsosmëri profesionale. Kjo synohet të arrihet nëpërmjet inkurajimit dhe mbështetjes së bashkëpunimit profesional dhe shkëmbimit të eksperiencës së mirë midis SAI-ve. Zyra Kombëtare e Auditimit, është ftuar t’i bashkohet këtij grupi në vitin e kaluar në takimin e mbajtur në Shkup të Maqedonisë. Aktualisht, ZKA është e angazhuar në auditimin përbashkët të performancës mbi ‘Cilësinë e ajrit’. Në kuadër të këtij takimi është mbajtur edhe seminari trajnues i dedikuar për të Dhënat dhe Analizat në Auditimin e Mjedisit, i cili është ndjekur nga dy auditorë të ZKA-së të përfshirë në auditimin e përbashkët për cilësinë e ajrit.   Diskutimi dhe shembujt e prezantuar gjatë punimeve shërbyen si një platformë e shkëlqyer për shkëmbimin e eksperiencave të përfaqësuesve të SAI-ve pjesëmarrëse në nxjerrjen e të dhënave, përpunimin e tyre dhe përdorimin e burimeve inovative të të dhënave.

Auditor i Përgjithshëm i Kosovës, z. Besnik Osmani, ka pritur sot në takim, Shkëlqesinë e tij z. Ruari O’Connell, ambasador i Britanisë së Madhe në Kosovë. Auditori i Përgjithshëm, ka informuar ambasadorin O’Connell me objektivat strategjike të Zyrës Kombëtare të Auditimit si dhe aktivitetet audituese për sezonën 2017/2018. Me këtë rast z. Osmani theksoi marrëdhëniet shumë të mira që Zyra Kombëtare e Auditmit të Kosovës ka me Zyrën Kombëtare të Auditimit të Britanisë së Madhe dhe shprehi interesimin e tij që bashkëpunimi ndërmjet këtyre dy institucioneve të intensifikohet edhe më shumë përmes projekteve të veçanta për shkëmbim të përvojave dhe praktikave të mira në auditim. Ambasadori O’Connell nga ana tij tha:  “E përgëzoj Zyrën e Auditorit të Përgjithshëm të Kosovës për  punën e mirë,  e cila konfirmohet edhe në Raportin e BE-së për Kosovën. Ne i inkurajojmë të vazhdojnë me punën e mirë dhe në të njëjtën kohë i bëjmë thirrje Kuvendit të Kosovës që të analizojë me vëmendje rekomandimet e këtyre raporteve.  Adresimi i raportit të auditimit është pjesë themelore e demokracisë dhe llogaridhënies. Prandaj, inkurajojmë Kuvendin të kërkoj përgjegjësi dhe llogaridhënie nga institucionet për çështje të ngritura në raportet e Auditorit të Përgjithshëm.” Gjatë takimit nga të dyja palët u theksua rëndësia e auditimit të jashtëm,  në veçanti ndikimi që ka në përmirësimin e vazhdueshëm në menaxhimin e mirë të financave publike, rritjen e transparencës në administratë publike dhe rritjen e cilësisë së shërbimeve për qytetarët. Ambasadori O’Connell takoi edhe grupin menaxhues dhe auditues senior në ZKA, ku është njoftuar më për së afërmi me objektivat dhe qasjen në auditim si dhe ka bashkëbiseduar me ta lidhur me rëndësinë që ka institucioni suprem i auditimit dhe puna audituese për një vend në zhvillim siç është Kosova.

Sot, në Zyrën Kombëtare të Auditimit kanë zhvilluar vizitë pune Driton Selmanaj, kryetar dhe Mërgim Lushtaku, zëvendëskryetar i Komisionit për Mbikëqyrje të Financave Publike i Kuvendit të Republikës së Kosovës. Qëllimi i vizitës ishte njohja më për së afërmi me ambientin e punës së auditorëve të jashtëm si dhe kapacitetet dhe burimet që Zyra Kombëtare e Auditimit ka në dispozicion për të përmbushur detyrat dhe mandatin e vet kushtetues. Auditori i Përgjithshëm, Besnik Osmani, i informoi drejtuesit e Komisionit për objektivat strategjike të ZKA-së, aktivitetet audituese dhe  planin vjetor të punës, zhvillimin e kapaciteteve audituese dhe sfidat aktuale me të cilat ballafaqohet ZKA. Z. Osmani i informoi drejtuesit e Komisionit edhe me gjetjet kryesore të raporteve të auditimit dhe theksoi rëndësinë e zbatimit të rekomandimeve të auditimit, që aktualisht nuk janë në një shkallë të kënaqshme. Driton Selmanaj, kryetar i Komisionit për Mbikëqyrje të Financave Publike theksoi përkushtimin e Komisionit për Mbikëqyrje të Financave Publike për thellimin e bashkëpunimit me Zyrën Kombëtare të Auditimit dhe vlerësoi rolin e ZKA-së në përkrahje të Kuvendit të Kosovës për të mbajtur Qeverinë llogaridhënëse.

Nga 11-13 tetor 2017, në Luksemburg, nën organizimin e Gjykatës Evropiane të Auditorëve, janë mbajtur takimet e drejtuesve të Institucioneve Supreme të Auditimit të vendeve anëtare, kandidate dhe kandidate potenciale të Bashkimit Evropian, ku po merr pjesë edhe delegacioni i Zyrës Kombëtare të Auditimit i kryesuar nga Auditori i Përgjithshëm, Besnik Osmani. Me datën 11 tetor, është mbajtur takimi i krerëve të ISA-ve të Rrjetit të vendeve kandidate dhe kandidate potenciale për në BE, me përfaqësues nga Kosova, Shqipëria, Turqia, Mali i Zi, Maqedonia, Bosnja dhe Hercegovina dhe Serbia si dhe përfaqësues nga Gjykata Evropiane e Llogarive, SIGMA dhe Grupi Punues i Komitetit të Kontaktit për Auditime të Përbashkëta, përfaqësuar nga Institucioni Suprem i Auditimit të Suedisë dhe Rumanisë. Në këtë takim krerët e Institucioneve Supreme të Auditimit kanë miratuar raportin e implementimit të aktiviteteve sipas planit 2014-2017 si dhe kanë diskutuar planin e punës për vitet vijuese 2018-2020 e më tutje. Me këtë rast Auditori i Përgjithshëm i Kosovës, z. Besnik Osmani, ka ofruar gatishmërinë e tij dhe të Zyrës Kombëtare të Auditimit që Kosova të jetë nikoqire e aktivitetit të parë, që do të zhvillohet në pjesën e parë të vitit 2018. Zyra Kombëtar e Auditimit po ashtu do të jetë pjesë e disa grupeve punuese përgaditore të këtyre aktivitete. Gjatë dy ditëve në vijim, më 12 e 13 tetor, është mbajtur edhe takimi vjetor i Komitetit të Kontaktit të Institucioneve Supreme të Auditimit të Bashkimit Evropian. Në këtë takim kanë marrë pjesë edhe Zyra Kombëtare e Auditimit e Kosovës dhe drejtues të ISA-ve nga vendet jo anëtare të BE-së, në cilësinë e vëzhguesit. Organizatore e takimeve të këtij viti ka qenë Gjykata Evropiane e Auditorëve, institucion ky që ka shënuar 40 vjetorin e themelimit të saj. Me këtë rast me datë 12 tetor është mbajtur ceremonia zyrtare në praninë e zyrtarëve të lartë të institucioneve evropiane, në mesin e të cilëve edhe Presidenti Parlamentit Evropian, z. Antonio Tajani dhe Presidenti i Komisionit Evropian, z. Jean Claude Juncker. Auditori i Përgjithshëm i Kosovës, z. Besnik Osmani, ishte i ftuar nderi në ceremoninë zyrtare nga Presidenti i Gjykatës Evropiane të Auditorëve, z. Klaus – Heiner Lehne.  

Këshilli për Bashkëpunim Rajonal ka publikuar Barometrin e Ballkanit për vitin 2017, në të cilin ofrohen të dhëna nga hulumtimi i opinionit të publikut dhe bizneseve në shtetet e Ballkanit. Një nga indikatorët për Barometrin e Ballkanit 2017 ishte edhe vlerësimi i besueshmërisë në institucionet publike dhe përceptimi i publikut për pavarësinë e tyre. Zyra Kombëtare e Auditimit të Kosovës është vlerësuar nga 47% e qytetarëve si institucion të cilit i besojnë qoftë plotësisht apo pjesërisht. Ky është niveli më i lartë i besueshmërisë krahasuar me institucionet supreme të auditimit të vendeve të Ballkanit. Ky vlerësim është një indikator i rëndësishëm në angazhimin e vazhdueshëm të Zyres Kombëtare të Auditimit në përmbushjen e mandatit të saj kushtetues e ligjor dhe të vizionit të saj për të përmirësuar transparencën, efikasitetin dhe llogaridhënien e administratës publike. Raportin e plotë mund ta gjeni në uebfaqen: Regional Cooperation Council

Rektori i Universitetit të Prishtinës “Hasan Prishtina”, prof. dr. Marjan Dema, priti në zyrën e tij Auditorin e Përgjithshëm nga Zyra Kombëtare e Auditimit, z. Besnik Osmanin. Në këtë takim të pranishëm ishin edhe prorektori për zhvillim dhe cilësi në Universitetin e Prishtinës “Hasan Prishtina”,prof. dr. Hysen Bytyqi, znj. Emine Fazliu – Ndihmës Auditor i Përgjithshëm për auditimet qendrore dhe Qendresa Mulaj - Udhëheqëse e Kabinetit të Auditorit të Përgjithshëm. Rektori Dema falënderoi shumë auditorin e përgjithshëm, z. Osmanin për vizitën, duke theksuar që ky menaxhment i UP-së do të jetë i lumtur nëse bashkëpunimi me Zyrën Kombëtare të Auditimit do të vazhdonte edhe më me intensitet në të ardhmen. Vullneti për bashkëpunim ishte i dyanshëm. Këtë e vuri në pah edhe Auditori i Përgjithshëm z. Osmani, i cili paraqiti disa ide ku të dyja institucionet do mund të krijonin projekte të rëndësishme së bashku. Palët aktualisht u dakorduan për realizimin e një mundësie për praktikë për studentët e UP-së, e cila do të realizohej në Zyr Kombëtare të Auditimit , mundësi për të cilën do të ketë një memorandum bashkëpunimi, i cili paraprakisht do të specifikojë bazën ligjore. Lajmi është marrë nga faqja e Universitetit të Prishtinës http://bit.ly/2xion5A

Auditori i Përgjithshëm, Besnik Osmani, mori pjesë në hapjen e trajnimeve për e-prokurimin të organizuara nga projekti i USAID “Komuna transparente, efektive dhe llogaridhënëse” në bashkëpunim me KRPP dhe IKAP. Të pranishëm me rastin e hapjes së trajnimeve ishin edhe Drejtori i Projektit, Stephen Carpenter dhe Drejtori i Agjencionit Kundër Korrupsionit, Shaip Havolli. Trajnimi është dy ditor dhe u dedikohet zyrtarëve nga Zyra Kombëtare e Auditimit, Agjencioni Kundër Korrupsionit, Njësisë Qendrore Harmonizuese për Auditimin e Brendshëm në kuadër të ministrisë së Financave dhe Komisioni Rregullativ i Prokurimit Publik, me qëllim të avancimit të njohurive të përdorimit të platformës elektronike për prokurim, për nevoja të auditimit, kontrollit dhe shqyrtimit të aktiviteteve të prokurimit. Nga Zyra Kombëtare e Auditimit këtë trajnim do ta ndjekin 20 zyrtarë.